កំពូលស្នាដៃយន្តការពេលវេលា Patek Philippe Grandmaster Chime បំបែកកំណត់ត្រានាឡិកាថ្លៃបំផុតក្នុងលោក

នៅក្នុងពិភពបច្ចេកវិទ្យាយន្តការ និងនាឡិកាដៃប្រណីតប្រវត្តិសាស្ត្រថ្មីមួយត្រូវបានកត់ត្រាយ៉ាងកក្រើក កាលពីពេលដែលកំពូលនាឡិកាដៃ Patek Philippe Grandmaster Chime លេខស្រឡាយ Ref. 6300G-010 ត្រូវបានដាក់ដេញថ្លៃក្នុងតម្លៃរហូតដល់ ៣១ លានដុល្លារអាមេរិក នៅក្នុងព្រឹត្តិការណ៍ដេញថ្លៃសប្បុរសធម៌ Only Watch នាទីក្រុងហ្សឺណែវ ប្រទេសស្វីស។ ការដេញថ្លៃក្នុងតម្លៃមហាសាលនេះ បានធ្វើឱ្យម៉ូដនាឡិកាមួយនេះក្លាយជានាឡិកាដៃដែលមានតម្លៃថ្លៃបំផុតក្នុងប្រវត្តិសាស្ត្រពិភពលោក ដោយវាត្រូវបានផលិតឡើងយ៉ាងពិសេសតែមួយគ្រឿងគត់នៅលើពិភពលោក ជាមួយនឹងការរួមផ្សំឡើងពីមាសស និងដែកថែប ព្រមទាំងរំលេចនូវមុខនាឡិកាពីរស្មុគស្មាញ និងមានមុខងារយន្តការពិសេសរហូតដល់ ២០ មុខងារផ្សេងៗគ្នា។ ទាក់ទិននឹងអត្តសញ្ញាណរបស់អ្នកដេញថ្លៃឈ្នះ និងបានកាន់កាប់ស្នាដៃឯកតម្លៃ ៣១ លានដុល្លារអាមេរិកនេះ ត្រូវបានរក្សាទុកជាសម្ងាត់បំផុតនៅពីក្រោយបាំងនាមជាអ្នកប្រមូលទិញនាឡិកាកំពូលមហាសេដ្ឋី។ ទោះបីជាយ៉ាងណាក៏ដោយ សម្រាប់ស្រឡាយនាឡិកា Grandmaster Chime កំណែទូទៅដែលមានតម្លៃចន្លោះពី ២.៥ លាន ទៅ ៥ លានដុល្លារអាមេរិក ក៏ត្រូវបានគេប្រទះឃើញនៅលើកដៃរបស់បុគ្គលល្បីៗកម្រិតពិភពលោកផងដែរ។ ក្នុងនោះ កំពូលតារាចម្រៀងរ៉េប និងជាមហាសេដ្ឋីអាមេរិក Jay-Z ធ្លាប់បានពាក់នាឡិកា Patek Philippe Grandmaster Chime Ref. 6300G តម្លៃប្រហែល ៣ លានដុល្លារ ចូលរួមក្នុងកម្មវិធីធំៗដូចជាពិធីប្រគល់រង្វាន់ Grammy និងខួបកំណើតតារាចម្រៀង Diddy រីឯតន្ត្រីករល្បីល្បាញ Eric Clapton ក៏ស្ថិតនៅក្នុងចំណោមបុគ្គលលំដាប់កំពូលដែលមានសិទ្ធិទិញ និងកាន់កាប់នាឡិកាស្រឡាយនេះដោយផ្ទាល់ពីក្រុមហ៊ុន Patek Philippe ផងដែរ។

នៅក្នុងរូបភាពនេះ នាឡិកាប្រធានព្រឹទ្ធសភា សម្តេច តេជោ ហ៊ុន សែន កំពុងពាក់ គឺជានាឡិកាដៃម៉ាក Patek Philippe Grandmaster Chime (លេខកូដស្រឡាយ Ref. 6300G)

ដោយឡែក បើទោះបីជានាឡិកា Graff Diamonds Hallucination មានតម្លៃរហូតដល់ ៥៥ លានដុល្លារអាមេរិកក៏ដោយ ប៉ុន្តែអ្នកជំនាញផ្នែកបច្ចេកវិទ្យានាឡិកាបានចាត់ថ្នាក់វាជាប្រភេទគ្រឿងអលង្ការតុបតែងដាំពេជ្រពណ៌កម្រ ប៉ុណ្ណោះ។ ហេតុនេះ Patek Philippe Grandmaster Chime នៅតែជានិមិត្តរូបកំពូល និងជានាឡិកាយន្តការស្មុគស្មាញពិតប្រាកដ ដែលគ្រងតំណែងជានាឡិកាដៃថ្លៃបំផុតនៅក្នុងប្រវត្តិសាស្ត្រពិភពលោកនាពេលបច្ចុប្បន្ន។

ជានាឡិកា Graff Diamonds Hallucination មានតម្លៃរហូតដល់ ៥៥ លានដុល្លារអាមេរិក